Ye Kisaka Lahu Hai Kaun Mara
dharati ki sulagati chhaati ke bechain sharaare puuchhate hain
ye kisaka lahu hai kaun mara – 2
ai rahabar mulq-o-qaum bata
ye kisaka lahu hai kaun mara
ye jalate huye ghar kisake hai
ye katate huye tan kisake hain
taqsim ke andhe tuufaan mein
lutate huye gulashan kisake hain
bad-bakt kizaayein kisaki hain
barabaad nasheman kisake hain
kuchh ham bhi sunein hamako bhi suna
ai rahabar mulq-o-qaum bata
ye kisaka lahu hai kaun mara
kis kaam ke hain ye din dharam
jo sharm ka daaman chaak karein
kis tarah ke hain ye desh bhagat
jo basate gharon ko kaak karein
ye ruuhein kaisi ruuhein hain
jo dharati ko naapaak karein
aankhein to utha nazarein to mila
ai rahabar mulq-o-qaum bata
ye kisaka lahu hai kaun mara
jis raam ke naam pe kuun bahe
us raam ki izzat kya hogi
jis din ke haathon laaj lute
us din ki qimat kya hogi
inasaan ki is zillat se pare
shaitaan ki zillat kya hogi
ye ved hata quraan utha
ai rahabar mulq-o-qaum bata
ye kisaka lahu hai kaun mara